الزعل والشك غزه گلبه وساده

اذراعي چان الك صــاير وساده

شــيوخ الگــوم اوديلك وســاده

تـلين گـلبـك القـاســــي عــــليّه

جســمي ما ينفعه الزاد يوماي

نســه حتــه الكلام وگــام يومي

الحگي علبگه امن الروح يماي

اشــتروني والولــف ردوه اليّه

اتـريد اتســامحه عـلمضه يـولـــه

شفت منه الهوايل لعب يوله (جوله)

خــوفك مــن ردي الاصــــل يـولـه

ابـــد مـــا بيه رحــم بــــس الأذيّه

نســيت اطويت صفحه من هوانه

وعـجـب تســأل تگلي منهو آنـــه

اليـحب چــان يتنفـــس من هوانه

وهـوه الــدنيه گـطعته إنتـه عـليّه

هـرش حـبك عـله الدلاّل ســده

تــعـلــه ومــا تـرده بـعـد ســـده

گــلبـك لـو صــدگ ينقفل ســده

ومـفتـاحـــه تحـطــه ابيـن اديه

احضره اعله الضلع اسمك وكتبه

وهجرك صار الي قســـمه وكتبــه

البـخـت طـره يلاعـبنـي وكـتبـــــه

غـلبـنــي والـعـذول اشــتمـت بــيّه

چـذب مــا صــدگ العـنك وصـل لي

شــجـاك اتغيـرت تگــطع وصــل لي

قبـلتــي انته ولـك اســجد وصـــــلي

وذكـــرك يغـفــر اذنـــوب العـلـــــيّه

ردت خــده إشــمـه گـال لا بـاس

طمـعت وچلبـت رد صـاح لابـس

شني طعم الحيا لا شبگ لا بوس

حلگ كون ابحلگ ريّه اعله ريّه